أكد أحمد السيد، نجم النادي الأهلي السابق، أن فوز الفريق على المقاولون العرب يمنح اللاعبين والجهاز الفني والإدارة والجماهير دفعة معنوية وثقة كبيرة، مشيدًا بالأداء الذي قدمه الفريق، ومشاركة عدد من اللاعبين الشباب.
وقال السيد، في تصريحات عبر برنامج «نمبر وان» الذي يقدمه الإعلامي محمد شبانة، ويذاع على قناة «CBC»:" الفوز بيديك ثقة، والمباراة اللي فاتت برضه لعبت كويس جدًا، وممكن تكون بدأت بعض السلبيات تختفي شوية، والدفاع كان كويس، وثلاثي نص الملعب كان أداؤه أفضل، والنهارده الحمد لله الأداء كان كويس جدًا، والأهلي سيطر على الماتش وكان عنده 3 أو 4 فرص، وواجه فريق قوي، فالحمد لله الفوز مهم ويدي ثقة للاعيبة والجهاز الفني ومجلس الإدارة والجماهير".
وأضاف: "أول إيجابية من الناحية الفنية إنك حسيت إن فيه زحمة كتير باستمرار، والأهلي بيلعب تحت ضغط طول الوقت، لكن لما الفريق اتحرر شوية وبدأ يلعب لقدام بقى ليه شكل أحلى، وظهرت فرص محمود صلاح وطاهر، والأهداف كمان كانت نتيجة تحركات كويسة جدًا، وخصوصًا التحرك من اليمين لجوه، وده تكتيك مهم جدًا".
وتابع: "مشاركة عدد من اللاعبين الصغار زي محمود صلاح ومحمد عبد الله وأحمد رضا وعمر معوض حاجة كويسة جدًا، ودي فرصة إنك تدي الشباب فرصة، لأن الأهلي داخل على 5 أو 6 بطولات، وبالتالي محتاج لعيبة كتير، واللاعيبة دي مميزة، ومهم تديهم ثقة وخبرة من خلال اللعب جنب لاعيبة كبيرة زي الشناوي وطاهر ومحمد هاني".
وأوضح: "محمود صلاح لفت نظري النهارده، لعب كويس جدًا، ومحمد عبد الله برضه قدم مباراة كويسة، لكن الكرة اللي ضاعت منه كان ممكن يدخل بيها جوه شوية أو يتصرف بشكل أفضل".
وأشاد بأداء طاهر محمد طاهر، قائلًا: "طاهر قدم أداء كويس جدًا، وأنا عاجبني إنه مركز في شغله وبعيد عن السوشيال ميديا".
وعن استمرار غياب إمام عاشور عن مباريات الأهلي، قال: "النادي الأهلي طول عمره أكبر من أي لاعب، ومفيش حد يقدر يسيطر على النادي الأهلي، ومفيش لاعب يضمن مكانه حتى لو اسمه كبير أو مستواه قليل، لازم تقدم وتثبت نفسك، وده مبدأ موجود في الأهلي مع كل الأجيال".
وأضاف: "ممكن عموتة يكون شايف إن إمام لسه موصلش للفورمة بتاعته، وإحنا كلنا عارفين إن إمام عاشور واحد من أفضل لاعيبة مصر، ومحدش يقدر ينكر ده، لكن ممكن يكون كان عنده إصابة مأثرة عليه شوية، وهو المفروض يركز مع نفسه ويشوف إيه اللي يرجعه لمستواه، لأنه لو رجع لفورمته هيكون إضافة كبيرة جدًا للأهلي".
إخلاء مسؤولية إن موقع بالبلدي يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
"جميع الحقوق محفوظة لأصحابها"
المصدر :" النبأ "
