ردت الفنانة ليلى زاهر، على الجدل المثار حول تصريحاتها هي وزوجها المنتج هشام جمال مع الإعلامي أنس بوخش، في برنامجه «AB Talks»، التي طُرحت منذ أيام، موضحة أن بعض أجزاء الحلقة تم تقطيعها، ما أدى إلى فهمها بشكل خاطئ.

ليلى زاهر

وقالت ليلى زاهر، عبر حسابها الشخصي بموقع التواصل الاجتماعي فيسبوك: “بحترم وبقدر ردود الأفعال واهتمامكم بس حابة أوضح كام نقطة لأن في أجزاء من الحلقة اتقطعت واتاخدت بمعاني غلط، تصوير حلقة «AB Talks»، حصل وأنا في آخر شهور الحمل، قبل التصوير إدارة أعمالنا بلغت فريق البرنامج إننا هنوصل متأخر لأني تعبت شوية، ولما وصلنا اعتذرنا لأنس وفريق البرنامج بالكامل على التأخير”.

وأضافت: “إحنا داخلين الاستوديو قلت لهشام إني لسه تعبانة وطلبت منه يساعد أكتر في إدارة الحوار لأني كنت تعبانة ولأن طاقتي بشكل عام أقل الفترة دي وده شيء طبيعي، موقف السفر حصل فعلًا! لكن بعدها لوحده اتكلم معايا وقال لي إنه انتبه إنه تصرف غلط بحكم طريقة نشأة شاب كتير وأنه نوع تصرفات محتاج تصحيح وعلاج وده كان تكملة كلامه الموجود في الحلقة الكاملة”.

واستكملت: “الحقيقة إن من يومها محصلش موقف مشابه، وفكرة إن رجل ياخد باله ويحل ويصارح بالمشكلة ويتغير عشانك هو أكيد شيء يحترم، أنا اخترتك! وأنا كمان اخترته.. لأن أسبابها متشابهة.. أكيد بحبه عشان طريقة تعامله معايا وكمان تعاملاته في حياته ومع الناس، وأكيد عشان شافيه الأحسن والأنسب والأحلى في كل حاجة، وسبب ذكر الجملة دي في الحلقة هو نقاش عن الغيرة، وإنه كان بيأكدلي هو ليه عمره ما بيشوف واحدة أحسن مني، مش لأنه بيشرح بطريقة متعالية زي ما الجزء اللي نزل كان بيتكتب عليه”.

كما قالت ليلى زاهر عن علاقتها بزوجها، قائلة: “علاقتي بـ هشام بدأت من 4 سنين، وبقالنا حوالي سنة ونص متجوزين وأنا أكتر واحدة عارفة تفاصيل علاقتنا وحياتنا واتفاقاتنا اللي بنحترمها وبتمشي علينا إحنا الاتنين، لكن أنا عندي أمي وجدتي وأخوات وصديقات قريبين مني جدًا، كلهم سيدات بخبرات مختلفة شايفين علاقتنا من قريب وعايشين تفاصيل كتير منها، وكلهم بيحترموا ويحبوه وبيساعدونا نكمل بنفس التفاهم اللي إحنا فيه”.

وتابعت: “أنا بتكلم عن شخص من يوم فرحنا لحد النهارده كل إيامي معاه حلوة، بيعاملني بكل حب واحترام وتقدير، شخص من أول يوم في حملي سايبني في تعب، ولا سفر لشغلي، ولا زيارة دكتور، لأنه حاططني أولوية في حياته وقدر يحويني بتغيرات مشاعري وأحاسيسي خلال تجربة جديدة علينا إحنا الاتنين، أنا اقدر أحكم على اللي أنا عايشة حاليًا.. وهو إننا عدينا أول مرحلة من الجواز بيتقال عليها من أصعب المراحل، بحب وتفاهم وأتمنى نكمل كده وأحسن إن شاء الله بعيدًا عن التنبوءات المتشائمة المتأثرة بانتشار العلاقات السامة واللي هيلاقوا دايمًا زاوية تقلب أو تصور أي شيء إيجابي لسلبي حتى الكلام اللي أنا بكتبه دلوقتي”.

واختتمت حديثها: “ربنا يكتب لكل حد السعادة والراحة في حياته بطريقته، وإن شاء الله تشوفونا بعد سنين أكتر، ونكون مبسوطين ومتفاهمين أكتر وأقدر أنا كمان أخليه سعيد قد ما هو بيخليني مبسوطة في حياتي، أخيرًا بطلب دعواتكم لينا وإحنا بنعيش واحدة من أسعد مراحل حياتنا، وبنستعد نستقبل أول مولودة لينا إن شاء الله”.