ردت النجمة أنغام على الشائعات التي طالتها مؤخرًا، بشأن الحملة الموجهة ضد النجمة شيرين عبد الوهاب بعد حفلها في مهرجان موازين، وما تردد عن أن أنغام كانت السبب وراء هذه الحملة.

أنغام

وقالت أنغام، خلال مداخلة هاتفية لها مع برنامج "كلمة أخيرة" الذي تقدمه الإعلامية لميس الحديدي على شاشة ON: "أنا مكنتش مصدقة الكلام خالص، أنا مش من الشخصيات اللي بتحب تدافع عن نفسها ولا بترد على الشائعات، ولا بدخل في مهاترات، وده منهجي في حياتي من زمان سواء على المستوى الشخصي أو المهني، أنا طول عمري بسيب الأمور تختفي لوحدها، وربنا بينصفني دايمًا."

وأضافت: “أنا ست اللي يعرفني كويس عارف إني مش بتاعة مشاكل، ولا بدعي المثالية، أنا إنسانة عادية بحب شغلي وبحترم جمهوري، وحتى اللي مش بيحبني بحترمه، لأن مفيش فنان بيتفق عليه كل الناس، وده طبيعي لأن الأذواق بتختلف”.

كما أوضحت أنغام: "الظلم المرة دي غير محتمل، لا قادرة أتكلم ولا قادرة أسكت، لكن الأمر وصل لدرجة التجريح والشتائم والتلميحات اللي مش مقبولة من ناس المفروض مسؤولين وزملاء، البعض بيقول إحنا عارفين مين ورا الحملة، والفانز بتوع المطربة المنافسة بيتكلموا وكأنهم عارفين حاجة، وفي مواقع كتبت اسمي بشكل مباشر، ليه الشتيمة والتجريح وأنا في المستشفى؟! محدش كان يعرف غير أقرب الناس ليا، وأنا على سرير المستشفى لقيت ناس بتبعتلي وبتشتمني وأنا مالي! هو أنا ليه علاقة بالمشكلة اللي حصلت في الحفلة؟! أنا مالي! ضمائركم راحت فين؟!".

وأردفت: "حتى لو مكنتش في المستشفى، مالي؟! أنا تحملت أربع سنين من التلميحات حتى منها شخصيًا، ومع ذلك ماردتش ولا مرة كنت بزعل بيني وبين نفسي وكنت بعذرها كتير، لكن نوصل لمرحلة توجيه الناس ضدي؟! تطلعوني كأني بتآمر وأقود حملات ضد زميلة؟! ده ظلم وحرام وعيب، أنا لا أتهمها شخصيًا، لكن في ناس حواليها بيقولوا كده وبيوجهوا الناس لكده، أنا مش هقول إني أكبر من كده وهي كمان أكبر من كده، بس عيب اللي بيحصل، واللي بيحاولوا يقربوا منها بطريقة مغلوطة يقولوا لها تحبها وتشجعها براحتك، لكن مالهمش دعوة بيا”.

وحذرت أنغام: “أي شخص هيتمادى وهيجيب سيريتي، مش هسكت. أنا فعلًا تعبت. ورفعت قضية على شاب قبل كده كتب عني على تويتر وقال 'مش هترحمي شيرين يا أنغام' وكسبت القضية اتحبس. وأي حد هيتجرأ تاني ويزج بإسمي مش هسكت”.

ولم تتمالك أنغام نفسها خلال المداخلة وبكت قائلة: "كفاية ظلم، كفاية كره، كفاية حقد، أنا تعبت، سبوني في حالي، محدش ليه دعوة بنيتي، ربنا اللي هيحاسبني، كفاية توجيه حملات ضدي،
ولما إعلامي يطلع يدافع عن شيرين له كل الاحترام، لكن وإنت بتبص على شيرين، بص كمان على أنغام اللي مالهاش علاقة بالموضوع، كفاية مقارنة عقيمة ومؤذية، هي اسمها شيرين وأنا اسمي أنغام، ليها جمهورها وليا جمهوري، ربنا يكرمنا كلنا، متدعيش لي، لكن على الأقل بلاش تدعي عليّ وتظلمني”.

ووجّهت أنغام رسالة مؤثرة لجمهورها قائلة: “أنا عايزة من الناس اللي بتحبني مايحطونيش في مقارنة مع حد، حبوني علشاني أنا، مش علشان أكون أحسن من حد. ماتقارنونيش بحد، ولا تقارنوا حد بيا حتى لو المقارنة في صالحي، أنا مش عايزاها. ده شيء مش مقبول ومش بيكبرني، ولو بتحبوني بجد، مش ده الأسلوب اللي تقدروا تكرموني بيه أو تدعموني بيه، لو سمحتوا، ماتحطونيش في مواقف تخلي الناس تعتقد إن أنا زقتكم  تعملوا ده”.