السبت 08/يونيو/2024 - 07:56 ص

تحدثت الفنانة ويزو، عن التنمر، ودور والديها في تشبيعها بالحب والثقة، حتى أنها لا تتأثر بأي تعليق سلبي، إلى جانب حديثها عن الحسد وكيف أثر على طفلها.

وقالت ويزو في لقائها مع القاهرة 24: مش بحب الظلم ومحبش حد يفتري على حد وأنا قاعدة أو قدامي، لأن ده ظلم بيّن وتنمر بيّن، لكن مسرح مصر بناخد وندي مع بعض، وده مش تنمر ده نوع من أنواع التمثيل زي إسماعيل ياسين، وكل فيلم كان لازم يتريق على بوقه وده نوع من أنوع الكوميديا، ومالوش علاقة بالتنمر.

ويزو تكشف موقفها من التنمر عليها 

وأضافت ويزو: وأنا صغيرة كان بيتقال لي بكابوزه بعد فيلم كلم ماما، واللي ظهرت فيه مها أحمد اللي بعشقها بشخصية بكابوزه، وكان بيتقال لي بكابوزه كتير جدا، لكن أنا أمي وأبويا مربين فيا إني لازم أتقبل نفسي، وإن شكلي حلو وربنا اللي خلقني وأنا أحلى واحدة في الدنيا، ومفيش حد زي وأنا متشبعة بحب النفس والذات والثقة، لكن في ناس تانية نفسها ضعيفة، ولو حد ماشي واتريقت عليه أو حد نزل صورة وكتبت له كومنت، فلو نفسه ضعيفة هيتأثر بده.

ويزو تروي موقفا لها مع الحسد

كما روت ويزو موقفا لها مع الحسد، قائلة: لما خلفت إسماعيل ابني  لقيت واحدة كاتبة لي يعني أنتي تخينة واتجوزتي وخلفتي وكمان ولد فابني نزل عيان.. إحنا عايشين في مجتمع بشري متوحش، فيه حاجة اسمها ما شاء الله أو الله أكبر، لأني بثق أن ربنا مديك الأربعة وعشرين قيراط والحمد لله.

واختتمت: فيه إيه فوقوا من التنمر، الموضوع بقى صعب ومستفز والموضوع معايا بيضحكني، لكن أحسد عيني عينك واتنمر عيني عينك، ده مش لذيذ ووالله العظيم أي حد بيكتب كلمة مش كويسة، هتترد له أوحش بكتير من اللي قالها.