لم تتخيل «منار» الشهيرة بـ «سيدة النعناع»، أن مقطع فيديو لها سيغير حياتها من بائعة على أحد الأرصفة إلى أم يبحث عنها الجميع، لشجاعتها الكبيرة في حماية ابنها والتكفل بمصاريفه.
«منار» فتاة عشرينية، تعرضت للضرب مرات عديدة من زوجها، ما دفعها لترك المنزل له: «سبب خلافي مع زوجي أنه كان بيضربني، فلما ضربني وأنا حامل أنا مأمنتش ليه تاني وسبته».
«جوزي كلمني بعد ما شاف الفيديو، بيقولي إيه اللي أنا شوفته ده، وبعدها قفل في وشي السكة»، وفقا لما روته «منار»، خلال حديثها في بث مباشر عبر «الوطن»: «لما كان بيكلمني متوقعتش أن الفيديو لحق وصله، وقفل في وشي السكة بدون ما يقولي حاجة مفيدة، أنا كنت مستنياه ييجي يسأل حتى على ابنه، كنت بتمنى أنه يعيش معاه».
3 شهور فقط المدة التي استغرقتها فترة بقاء منار مع زوجها، مضيفة: «متجوزين بقالنا سنتين، لكن بعد شهور من الجواز رجعت على بيت أهلي، لكن من وقت ما خلفت اضطريت أنزل أبيع نعناع علشان أقدر أصرف عليه».
ورفضت الفتاة العشرينية، فكرة العودة إلى زوجها مرة أخرى: «نفسي أتطلق منه، لكن مكنش عندي إمكانية أرفع عليه قضية، رغم أنه كان بيصرف عليا لكن سبته علشان بيضربني باستمرار».
وتعيش «منار» مع عمتها: «أهلي موجودين، وبيسألوا دايما عليا، لكن طبيعي كل واحد فيهم عايش حياته، فلازم أشتغل علشان أقدر أصرف على ابني».
فيديو يغيِّر حياة «منار»
وثَّق المذيع حسين الجوهري، التابع لمؤسسة كريمة العلا، واقعة سيدة النعناع، بمقطع فيديو غير حياة «منار»: «لقيتها قاعدة بابنها في عز التلج، فلما روحنا لها لقينها مش عاوزة تاخد مساعدة من حد، وهي مطلبتش غير شغل وأوضة تقعد فيها، فيه ناس تعاطفت معاها وجابتلها أجهزة وتبرعات بفلوس كتير، كمان جالها محاميين عاوزين يرفعوا لها قضية».
وبحسب «حسين»: «إحنا فخورين باللي إنتي بتعمليه، بنت زيك في العشرينات وبتعتمد على نفسها على تصرف على ابنها، الفلوس دي مش تبرعات دي دعم ليكي الناس باعتهولك».
بالبلدي | BeLBaLaDy
إخلاء مسؤولية إن موقع بالبلدي يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
"جميع الحقوق محفوظة لأصحابها"
المصدر :" الوطن "
0 تعليق