belbalady.net يقدم "اليوم السابع" على مدار شهر رمضان فزورة بعنوان "أنا مين"، عن نجم من نجوم زمان عبارة عن معلومات من حياته ومسيرته، وذلك من خلال تليفزيون "اليوم السابع" وسنتلقى إجابتكم على حل الفزورة، التي تذاع يوم الإثنين والأربعاء والجمعة طوال شهر رمضان الجارى.

 

فزورة اليوم عن الأستاذ اللي اتعلمنا من فوازيره وضحكنا في أفلامه ومسرحياته، وكان عمنا كلنا، واحدة من أخواته كانت مذيعة مشهورة في الإذاعة المصرية، ووالدته كانت رافضة دخوله التمثيل و كانت بتقوله "عايز تبقي مشخصاتي وتضيع اسم العيلة"، وفى أول دور ليه ككومبارس طردته من على المسرح قدام الكل وقالت له "انزل من على المسرح يا ولد".

"شافه نجيب الريحانى علي مسرح الجامعة وقاله ملامحك جادة بس هتكون كوميديان صاعد و فعلا بقى "مهندس الكوميديا"، وبعدها الريحاني ضمه لفرقته اللي كانت بتقدم مسرحيات فى الإذاعة، فضل 10 سنين سنيد للبطل لحد ما وصل لأفلام من بطولته،  وفضل 10 سنين كمان في رمضان بيقدملنا فوازير كان بيستناها الكبار والصغيرين وقت العصرية، وفوازيره طلعت نجوم للشاشة زي هاني رمزي و نسرين ووائل نور.

فوازيره دايما موجودة في قلوبنا أصله صدق لما قال "لفيت أنا لفيت الدنيا ما خليت.. لاسبت لا شارع ولا بيت"، وخلال مشواره الفني قابل البنبوناية الملبساية وطلب إيديها على المسرح  وعملوا ثنائي يجنن، كان بيغير عليها جدا لدرجة انه في مرة اتخانقوا وخرج من البيت بشنطة هدومه بلا رجعة. كل حاجة حلوة كان بيحبها فارقته، اعز صحابه وبيته وذكرياته. لو عرفته قولنا هو مين وإيه أكتر أعمال حبيتها ليه. وتوتة توتة خلصت الفزورة.