حلت الفنانة انتصار ضيفة على برنامج «ع المسرح»، الذي تقدمه الإعلامية منى عبد الوهاب، ويذاع عبر شاشة قناة «الحياة»، وردت على جدل تعليمها التمثيل لنيللي كريم في مسلسل «ذات».

ووجهت الإعلامية منى عبد الوهاب سؤالا لـ انتصار قائلة: «كاملة أبو ذكري قالت إنك ممثلة شاطرة جدا، بس مش هتشتغل معاكي تاني لأنك غير منضبطة»، لترد عليها قائلة:«أتمني إن المخرجة كاملة أبو ذكري متتكلمش كتير في البرامج لأنه مش صح، وبراحتها مشتغلش معايا تاني».

وتابعت:«انتي مخرجة كبيرة ليكي اسم مينفعش البرامج تستغلك، وتطلعي تتكلمي عن زملائك وحش، لأنك من أهم المخرجين الموجودين في الشرق الأوسط، وأنا بحبها جدا لانها صحبتي».

وعن جدل تعليم انتصار وباسم سمرة التمثيل لنيللي كريم فى مسلسل ذات، قالت انتصار:«أنا قولت كدا عشان باسم سمرة طلع وقال في لقاء وقال إني أنا وانتصار علمنا نيللي كريم التمثيل، وأنا اتزنقت في لقاء بعدها ع طول، وقولت ساعتها مكنش يقصد هو كان قصده إنه في الفترة دي كنا بنمثل بقالنا فترة طويلة، وهي وقتها كانت راقصة شاطرة، كانت بتلعب باليه حلو جدا، وعجبني ساعتها إني نيللي كريم مردتش خالص واحترمتها جدا».